香港外傭工傷處理指南（第二集）：點樣申請補償？四種處理方法僱主要知

外傭每日為家庭忙前忙後，一旦發生工傷意外，唔單止影響佢哋嘅健康，對僱主嚟講都可能帶嚟法律責任同埋金錢壓力。上篇文章講咗僱主根據《僱員補償條例》有責任為外傭處理工傷賠償，今次我哋就講下 一旦外傭真係受傷，應該點樣正式處理申請補償？

根據香港法例，其實工傷補償有幾種常見處理方式，視乎受傷程度、病假日數同雙方有冇爭議，處理程序會唔同。以下為大家逐一講解。

1. 工傷病假少於3日：僱主直接支付補償

如果外傭只係受傷輕微，例如切到手或輕微扭傷，而病假唔超過3日，亦冇導致永久傷殘，僱主就可以 直接支付補償。

換句話講，僱主只需要照正常出糧日期，連同工傷期間應得嘅病假薪金畀外傭就可以，唔需要額外報法院或做評估。

2. 病假超過3日但唔多過7日：可雙方協議補償金額

如果病假由第4日至第7日之間，仍然屬於較輕微個案，而且外傭冇永久喪失工作能力，僱主同外傭可以按法例 雙方協議補償安排。

同樣地，僱主要喺正常出糧日或之前支付病假薪金。最好可以有簡單書面紀錄，避免日後有爭議。

3. 嚴重工傷或有後遺症：由勞工處發「補償評估證明書」

如果外傭工傷情況比較嚴重，例如傷到肌肉、骨折，甚至影響長遠工作能力，又或者病假超過7日，呢類個案就需要交由勞工處處理評估。

勞工處會安排外傭進行身體檢查，評估傷勢後向僱主與外傭發出 「補償評估證明書」（表格5），列明僱主需要賠償嘅金額。如果懷疑有永久傷殘情況，勞工處會轉介外傭到「僱員補償評估委員會」再判定，並發出另一份評估證明書（表格7或8），再補發最終補償金額。

僱主要注意：收到證明書之後，要喺 21日內支付全數補償金及相關醫療費用。如果對評估有異議，雙方可於 14日內書面提出反對，勞工處會再審核，發出覆檢結果（表格6）。

4. 雙方無法協議：可交由法院處理

如果係工傷病假少於3日，但雙方爭拗嚴重，解決唔到，外傭可以去小額錢債審裁處追討賠償。若然係更嚴重或更複雜嘅賠償爭議，則需要交由區域法院審理。不過，走法律程序費時費力，雙方最好盡量透過勞工處調解或協議解決。

總結：及早處理、配合申報、準備好保險最重要

無論外傭工傷嚴重與否，作為僱主，第一時間了解事件、安排醫療、聯絡勞工處並準時支付應得補償，係最基本責任。記住工傷唔一定係外傭失誤先發生，即使係佢哋自己唔小心，僱主都有法律責任處理賠償。若然有購買涵蓋僱員補償責任嘅綜合家傭保險計劃，例如包括「僱主責任保障」及「住院開支」等項目，喺處理工傷時會大大減輕財務負擔，亦更有信心面對突發情況。下一集將會分享補償金額計算方法。

相關產品

加洲保險最新家傭保險計劃，全港最高保障額，高達$88,000港幣住院及手術費用保障；設有服務中斷現金津貼，每日最多$200；更特設家傭試用保障及預留保障365日, 了解更多或立即申請

本文章中提供的信息僅供一般參考，不作為任何形式的建議。 本公司對其使用不承擔任何性質的責任。