點揀外傭中介？5個提示幫你搵到可信嘅代理

請外傭，第一關就係揀中介。市場上中介多如繁星，質素參差，一間唔可靠嘅中介，可以文件出錯、令外傭延誤到港、合約有漏洞，甚至連姐姐嘅背景都唔清唔楚。最慘係，中伏往往係簽約之後先發現，所以一定做足功夫先好做決定。

‍ ‍

1. 必須持有「職業介紹所牌照」（EAA）

呢點係最基本，但偏偏好多人忽略。根據香港法例，所有外傭中介必須持有勞工處發出嘅職業介紹所牌照（Employment Agency Licence），無牌經營屬違法。你可以直接上勞工處網站查冊，確認牌照是否有效、有冇被暫停或撤銷，五分鐘搞掂，唔查就係你自己大意。

如果你請印尼傭工，中介仲需要獲得印尼駐港總領事館（KJRI）認可；請菲律賓傭工就要搵有菲律賓海外勞工事務委員會（POLO）認可嘅中介。

‍ ‍

2. 查勞工處中介黑名單

勞工處設有俗稱嘅「黑名單」，列出曾被正式警告、定罪、被撤銷或拒絶續發牌照嘅中介。上咗榜唔代表一定係黑店，但有警告紀錄就係響起咗警號，絕對值得提高警惕。上勞工處官網搜尋一下，用幾分鐘Check Check，卻可能幫你避免好大麻煩。 

‍ ‍

3. 睇口碑 網上做資料搜集

Google評分係最簡單嘅參考，但唔係全部。真正有用嘅，係內容詳細嘅真實評價，特別係提到換傭經歷、投訴處理、甚至中介出錯後點跟進嘅留言。親子王國及Facebook 有多個群組都好多外傭相關討論，搜尋中介名字，有時會有意想不到嘅收穫。

不過，喺討論區問問題都要有技巧，唔好淨係問「呢間點呀？」要問得具體先有料到，例如：「查詢時幾快回覆？」「職員禮唔禮貌、有冇耐心解釋？」「有冇主動提醒你簽證到期、護照續期、保險幾時要買返？」呢啲細節，最能反映一間中介係咪真係有心做嘢。

事實上，一間專業嘅中介，應該主動幫你留意各種文件期限，而唔係等你自己發現。坊間試過有中介連外傭簽證批准期都睇錯，搞到僱主畀入境處罰款，心力交瘁之餘仲要追究責任，呢啲正正係唔專業嘅表現。對《標準僱傭合約》內容是否熟書，亦係一個重要指標，合約條款佢哋應該答得出，而唔係靠你自己去搞清楚。

最後，當你同外傭之間出現磨擦或誤會，中介會唔會願意派人做翻譯同調解。呢種售後支援，正正係只有簽約之後先見到真章，所以事前多問清楚，係十分重要。身邊親友嘅親身推薦，係另一個最可信嘅參考，遠勝一百個陌生評語。

4. 收費一定要透明

「平靚正」呢樣野，通常只係幻想。收費過低，有時反映服務質素參差，甚至係靠向外傭收取不合規費用補貼。但收費貴都唔係保證，市場上照樣有收費不菲但服務一般嘅中介。

真正值得睇嘅，係收費是否透明清晰。負責任嘅中介應該逐項列明收費，包括服務費、文件費、換傭條款等，唔應該係簽完先話你知有額外收費，或者用含糊字眼蒙混過關。查詢時對方支吾以對、唔肯清楚報價，本身已經係一個大警號，應考慮是否趁早走人。

5. 中介推薦嘅保險，是否真係最啱你

唔少中介會喺辦理入職手續時順帶推薦或代辦家傭保險，一條龍固然方便，但要考慮中介推薦嘅保險是否係市場上最適合你嘅方案。揀中介係「買人才」，揀保險係「買保障」，兩件事應該分開諗、分開比較，唔應該因為貪方便而省略呢個步驟。

總結

揀中介，功夫一定要喺簽約之前做足，唔係出咗事先後悔。查牌照、查黑名單、問清楚收費，再睇真實口碑，做齊呢幾步，已經好大機會幫你過濾掉大部分唔可靠嘅選擇。請外傭係長線關係，第一步揀啱人，後面自然順暢好多。至於保險方面，建議入職前獨立比較唔同方案，確保保障全面，萬一外傭發生工傷或意外，你同姐姐都有足夠保護。

‍ ‍

相關產品

加洲保險最新家傭保險計劃，全港最高保障額，高達$88,000港幣住院及手術費用保障；設有服務中斷現金津貼，每日最多$200；更特設家傭試用保障及預留保障365日, 了解更多或立即申請

本文章中提供的信息僅供一般參考，不作為任何形式的建議。 本公司對其使用不承擔任何性質的責任

‍ ‍